Реконструкција на две улици во Гостивар, кај гимназијата и кон Долна Бањица

Во Гостивар во тек е реконструкција на две улици, дел од проектите кои се финансирани од владината програма за поддршка на општинските инфраструктурни инвестиции. Работи се изведуваат на улицата „Сервет Бајрами“ (од Долна Бањица до гимназија) и „Никола Тесла“ (спроти влезот на гимназијата).

Во увид на терен таму, денес беше градоначалникот Ваљбон Лимани.

„Ги посетивме двете улици на кои се врши целосна реконструкција, со тротоари како што е предвидено со проектот. На тој начин на нашите граѓани ќе им понудиме подобри услови и побезбедно движење.“, рече Лимани.

Улицата „Сервет Бајрами“ е во должина од 770 метри, додека „Никола Тесла“ околу 440 метри. Овие инфраструктурни зафати се во вредност од околу 30 милиони денари.

Како што најави градоначалникот, следната недела се очекува почеток на два капитални проекти во Гостивар:

„Веќе сите процедури за реконструкција на бул.„Браќа Ѓиноски“ се завршени, одобренијата се земени и се надевам дека во тек на наредна недела ќе се започне со работа. Исто така, најверојатно наредната недела ќе се почне со работа и на ул „Беличица“ во склоп на проект со Светска банка преку Министерството за транспорт и врски“.

При теренскиот увид Лимани го придружуваше и министерот за здравство Арбен Таравари, кој претходно беше во посета на гостиварската болница, како и општински советници и административци.