Релативно стабилна состојба со Ковид 19 во Гостивар, растот на заболени е резултат од укинувањето на рестриктивните мерки

Зголемената бројка на новодијагностицирани пациенти со Ковид 19 во поширокиот регион на Гостивар, не е загрижувачка, сметаат надлежните и остануваат на оценката дека состојбата е релативно стабилна.

Со последните потврдени случаи, вкупно активно болни има 47 лица, од кои во Општина Гостивар – 23, во Општина Врапчиште 20 и Маврово Ростуше – 4.

„Ако се спореди Гостивар, со тоа што се случува во цела држава каде за 5-6 дена има над 1.000 новозаболени, кај нас состојбата е релативно стабилна. Вистина е дека Гостивар сега ги бележи највисоките бројки од почетокот на самата пандемија, меѓутоа тоа повеќе се должи на укинувањето на рестриктивните мерки, кои сметам дека не треба да ги има, не треба да се враќаат, туку граѓаните мора да се научат да живеат со вирусот, почитувајќи ги мерките за заштита. Вирусот ќе биде дел од нашето секојдневие, не само во Македонија, туку и во цел свет“, изјави градоначалникот Арбен Таравари.

Викендов беше евидентиран смртен случај на трудница од територијата на Општина Врапчиште на возраст од 31 година, позитивна на ковид 19.

„За жал имавме случај од Општина Врапчиште којшто заврши летално, од податоците кои ние ги добивме пациентката имала коморбидитети кои ја искомплицирале ситуацијата. Изразуваме жалење, и се надевам што помалку да има случаи со сериозни последици“, рече градоначалникот.

Тој посочи дека во Гостивар кај 10 до 15 пациенти до крајот на неделата поминуваат две недели од инфекцијата и ќе им се прават потребните двојни контролни тестови, по што би биле прогласени за оздравени.