Реоформен Младинскиот совет во Гостивар

Во Гостивар повторно ќе функционира Локален младински совет, како тело кое ќе ја застапува младата генерација и ќе се залага за нејзините барања и потреби. Одлуката за реактивирање беше донесена на денешната седница на Советот на Општина Гостивар.

„Формирањето на Локалниот младински совет е нов предизвик и има за цел да го зголеми учеството на младите во заедницата, во креирањето на локалните политики, како и во донесување на одлуки важни за заедницата. За младите ова претставува мотивирачки чекор за активно граѓанство.“, рече Азра Нуредини, како координатор од локалната самоуправа, а потоа даде осврт на работата и функционирањето на младинските центри кои ги има во Гостивар, како и на активностите и проектите коишто тие ги спроведуваат со фокус на младата популација.

Локалниот младински совет на Општина Гостивар има 11 членови кои доаѓаат од средни училишта, подмладоци на политички партии и граѓански организации. Нивниот мандат ќе трае две години.

На денешната седница на општинскиот совет беа изгласани и годишни планови за вработување на неколку училишта, како и измена на планот за вработување на Општина Гостивар.

Советниците ја усвоија и Програмата за уредување на градежно земјиште, а донесоа и неколку други одлуки од областа на урбанизмот главно врзани со легализацијата на бесправно изградени објекти.