Решена мистеријата на Бермудскиот триаголник?

Озлогласениот триаголник во Атланскиот океан меѓу Флорида, Порторико и Бермудските острови го привлекува вниманието на јавноста повеќе од еден век. Во оваа област мистериозно исчезнале десетици бродови и авиони. Причината до сега не била утврдена, а се појавувале разни теории што ги „голта“ бродовите и авионите: од подводни пирамиди до вонземјански бази.

Последното истражување на британските океанографи покажало дека се работи за џиновски бранови кои се појавуваат во таа област, пишуваат светските медиуми. Ги нарекле „екстремно олујни бранови“, нивната висина изнесува над 30 метри, а се резултат на три олујни струи кои се вкрстуваат на местото. Стручњаците од Универзитетот во Саутемптон, за потребите на истражувањето вештачки создале такви бранови, како и модел на брод кој исчезнал во Бермудскиот триаголник во 1918 година, во кој имало 300 луѓе. Тие тврдат дека чудовишните бранови ја решаваат мистеријата која го мачи светот повеќе од 100 години.

Најпознати исчезнувања во Бермудскиот триаголник:

1918 – Бродот USS Киклопс исчезнал заедно со 300 луѓе на патот од Барбадос во Балтимор

1941 – Бродовите Протеус и Нереус исчезнале на одвоени патувања од Девствените острови во САД

1947 – Воениот Ц-45 супертврдина, исчезнал 100 милји од Бермуди

1948 – Тудор 4 со 4 мотори се изгубил со 31 жртва

1948 – ДЦ-3 е изгубен со 32 патници и екипажот

1949 – Исчезнал и втор Тудор 4

1950 – Изгубен е големиот глобмастер на американските воени сили

1950 – Американскиот товарен брод СС Сандра долг 350 стапки, потонал без трага

1952 – Британскиот транспортен авион Јорк бил изгубен со 33 лица.

1954 – Локид констелејшен на американската морнарица исчезнал со 42 лица

1956 – Хидроавионот Мартин П5М на американската морнарица исчезнал со 10 членови на екипажот

1962 – Изгубен е КБ-50 танкер авион на американските воздушни сили

1963 – Марине Силфур Квин, американски товарен брод долг 425 стапки, исчезнал со целиот екипаж.

1963 – Два големи стратотанкери на американските воздушни сили исчезнуваат на едноставна вежба

1967 – Изгубен е воениот УЦ-122 претворен во товарен авион.

1972 – Германски товарен авион Анита, 20.000 тони исчезнал со 32 членови на екипажот