Ревија на рециклирана мода во Гостивар – спој на хуманост, креативност, екологија

Младите гостиварци покажаа како успешно може да се спојат хуманоста, креативноста и екологијата. Вчеравечер под мотото “Креираме модели за хумани цели!“ во Гостивар се одржа хуманитарна модна ревија на модели изработени од рециклирачки материјали. На сцената продефилираа основки и средношколки од гостиварските училишта во креации направени од весници, салфетки, пластични чаши, цд-а, најлон и слично.

Настанот го организираа младите волонтери во рамки на Програмата за промоција на хумани вредности на Црвениот крст.

„Идејата и целта е да рециклираме, креираме и помагаме. Учениците со своите ментори беа многу вредни и на моделите работеа изминатите два месеци“, рече Ангела Ангелкоска, волонтер

Секое училиште имаше посебна тема на своите модели, како на пример, светлина, виножито, шеесеттите години, традиција и други.

Модната ревија беше збогатена со музички изведби на млади гостиварци. Парите собрани од влезниците ќе бидат наменети за помош на социјално загрозено семејство.