Култура

Режисерот и актер Стојче Нешкоски по повод Светскиот ден на театарот

Објавено

пред 7 години

на

27/03/2017

Од

Gostivarpress.mk

„Гостивар има долга традиција на негување на театарскиот живот“

„Театарот е битен сегмент од човековиот живот. Театарот е огледало на општеството, на личноста, на се` она што не` опкружува и тоа најдобро може да се види на сцената. Театарот отсликува личности, карактери, време и кога гледачот се наоѓа во самата сала и ја следи претставата, самиот тој станува дел од неа, од ликовите и од целиот амбинет“, вели гостиварскиот режисер и актер Стојче Нешкоски, по повод Светскиот ден на театарот, 27 март.

Нешкоски е посветен на театарската сцена целиот свој живот. Со голема љубов зборува дека Гостивар, иако нема професионален театар, има долга традиција на негување на драмската уметност. Аматерскиот театар кој со децении успешно опстојува, зад себе има бројни претстави од сите жанрови, гостувања, награди, признанија. „Низ годините, сме тежнееле да се оформи професионален театар, но веројатно немало услови за тоа. Сепак, аматерскиот театар ги исполнува сите потреби во тој поглед на нашиот град. Многу глумци поминале низ гостиварскиот аматерски театар, а сега веќе на наше големо задоволство има нови, млади сили кои внесуваат новини во театарот и со својата креација го кажуваат нивното гледиште и сфаќање на денешниот живот“, потенцира Стојче.

Во театарот во Центарот за култура во Гостивар моментално се подготвуваат две претстави: битовата драма „Чорбаџи Теодос“ од Васил Иљоски и комедијата „Ѓаволштините на Скапен“ од Молиер.

Меѓународниот ден на театарот, 27 март, низ светот се одбележува со претстави и читање на пораките за сценската уметност.

„Не постои театарот поради нас, туку ние постоиме благодарејќи му нему. Театарот е силен. Тој се спротивставува и преживува сè: војни, цензури, сиромаштија“, стои во светската порака на Изабел Ипер, француска филмска и театарска глумица. Македонската порака по повод денот ја напиша Благој Мицевски, режисер и уметнички директор на Народниот театар од Битола. Дел од неа гласи: „Многумина, ќе речат дека театарот има моќ да го менува светот на подобро. Сведоци сме дека тоа не е така, но, сепак, театарот има моќ да го менува човекот, да создава подобри светови од оној во којшто секојдневно живееме“.