Резултати од Министерство за култура – за Парк фестивал во Гостивар 2 милиони денари, за театарскиот фестивал Отело 1,2

Министерството за култура ги објави резултатите од годишните конкурси за финансирање проекти од национален интерес во културата за 2021 година. За распределба на 11 милиони евра пристигнале рекорден број, 6.352 апликации.

„Морам да кажам дека сум разочарана што дел од апликантите побарале непристојно големи суми и побарале средства за проекти кои поради пандемијата на ковид-19 тешко дека ќе може да се реализираат. Исто така, забележавме дека исти лица си конкурираат сами на себе, еднаш се појавуваат како автори, друг пат како уредници, трета пат како консултанти, четврти пат како учесници во манифестација, петти пат како членови на жири-комисии, шести пат во групен проект, едноставно кажано исти лица си конкурираат самите на себе и така конкурсот ја изгуби смислата на натпревар. Неретки се и оние кои палицираа со копи-пејст проекти, кои изминатите години веќе биле поддржани. Во еден ваков сложен и крајно проблематичен контекст, и комисиите и јас како министерка, зазедовме став за една суштинска позиција: да се обезбеди одговорна, транспарентна и праведна дистрибуција на парите на даночните обврзници за културата“, истакна министерката за култура, Ирена Стефоска.

Поголеми суми за проекти од Гостивар се одобрени за „Парк фестивал“ околу 2 милиони денари и театарскиот фестивал „Отело“ – 1,2 милиони денари. Целосните листи со резултати може да се погледнат на страницата на Министерството за култура.