Роберт Исаиловски го извади крстот положен во Вардар на Богојавление во Гостивар

Светиот крст за Богојавление Водици во Гостивар годинава од водите на Вардар го извади Роберт Исаиловски. Тој беше најсреќен меѓу 35-мината гостиварци кои учествуваа во традицијата на фаќање на крстот, кој беше положен во реката по чинот на осветување на водите кој ги изврши Владиката г.Јосиф. Големиот православен празник буди радост и сплотеност меѓу верниците, кои на сите учесници, а особено на најсреќниот им упатија искрени желби за здравје, бериќет и благосостојба.

Гостивар и годинава имаше масовно и достоинствено празнување на Богојавление.  Прославата започна утрово со света литургија, а потоа литијата тргна од пред соборниот храм „Успение на Пресвета Богородица“ и преку централното градско подрачје се движеше до малиот мост на Вардар, пеејќи ја песната „Во Јордање“. Таму беше извршен чинот на осветување на водите и положување на светиот крст во реката.

Gostivarpress.mk во текот на денот ќе објави фото репортажа од највпечатливите моменти на манифестацијата.

Бог се јави-Навистина се јави!