Родители во Њујорк организираат „морбили забави“ за да си ги заразат децата со мали сипаници

Њујорк се соочува со една од најголемите епидемии на мали сипаници, поради што во еден округ од оваа американска држава беше прогласена и вонредна состојба. На малолетниците кои не се вакцинирани против морбили им е забранет пристап на јавни места, не смеат да одат во училиште, во трговски центри, на концерти…Во меѓувреме се спроведува вонредна вакцинација со МРП (морбили, рубеола, заушки). Казната за оние кои нема да се вакцинираат според препораките изнесува 1.000 долари.

Додека властите преземаат низа мерки да го спречат ширењето на малите сипаници, антиваксерите одат во крајност. Американските медиуми пишуваат дека родители кои ги поддржуваат антивакциналните кампањи организираат „морбили забави“ на кои ги носат своите невакцинирани деца да се дружат со веќе заболени врсници и намерно ги изложуваат на вирусот за да се заразат.

Лекарите сметаат дека бројката на родители во Њујорк кои се спротивставуваат на вакцинирањето станува загрижувачка. За сега обидите да ги разубедат дека МРП вакцината е единствениот начин за заштита од зараза и дека малите сипаници можат да бидат многу опасни по здравјето на детето, остануваат залудни.