Русино ќе се модернизира во фази, ветено решавање на барањата на жителите

Долгогодишните најави за уредување и модернизирање на регионалната депонија Русино, чекорат кон исполнување. Градоначалниците од полошките општини, заедно со министрите за животна средина, Садула Дураки и за локална самоуправа, Сухејл Фазлиу го промовираа Проектот за подобрување на управувањето со цврст отпад во Полошкиот регион со кој треба да се воспостави соодветен систем за собирање, третман и преработка на комуналниот отпад, усогласен со европското законодавство. Иако, состојбата со ѓубрето речиси во сите општини е алармантна, чекорите кон долготрајното решавање на проблемот, сепак ќе бидат мали и постепени. Најпрво, во рок од една година, ќе се врши испитување на теренот, квалитетот на почвата и штетноста врз водата и воздухот, а потоа ќе се пристапи на реализација на регионални инвестициски мерки и инфраструктура и опремување на јавните претпријатија.

„Во меѓувреме предвидени се краткотрочни мерки, односно дренажа на земјиштето и отпадните води, која е важна и за населението и за долгорочната мерка, стандардизирање на цела депонија Русино“, изјави Теута Арифи, градоначалник на Тетово.

Гостиварскиот градоначалник Арбен Таравари информираше дека жителите од селата околу Русино, имаат свои барања со кои ќе им се гарантира дека депонијата нема да им го загрозува здравјето. „Се надевам дека ќе исполниме барем половина од нив, особено за заштита на почвата, воздухот и водите од натамошно загадување“, рече градоначалникот.

Проектот за подобрување на управувањето со цврст отпад во Полошкиот регион финансиски е поддржан од Швајцарската Влада со 7,8 милиони швајцарски франци.