Саем на книга во Гостивар: Тридневен празник за вљубениците во читањето

Вљубениците во читањето од Гостивар и регионот имаат можност да ги збогатат домашните библиотеки со нови наслови. Во спортската сала „Младост“ во Гостивар денес свечено беше отворен Саем на книгата од мултиетнички карактер, на кој учествуваат петнаесетина издавачки куќи, со дела на домашни и странски автори. На штандовите има книги од различни жанрови: белетристика, стручна литература, детски книги, енциклопедии и друго.

„Ние на Саемот се претставуваме со пет издавачки куќи и нудиме најразлична литература за сите возрасти. Ги покануваме граѓаните да дојдат, да бидат дел од овој Саем и да ги збогатат своите библиотеки со нови книги“, рече Ива Никодиновска од книжарници „Култура Гост“.

Саемот на книгата се организира под покровителство на општина Гостивар, во соработка со Здружението на албански издавачи во Македонија.

„Сакам да пренесам порака како лекар, невролог. Најдобар начин за развивање на имагинацијата е читањето на книги. Се надевам дека секој гостиварец ќе го посети Саемот, ќе купи книга и што повеќе сите да посветуваме време на читање, наместо да седиме на телефони и таблети.“, нагласи на свеченото отворање градоначалникот Арбен Таравари.

Саемот на книгата во Гостивар ќе трае три дена, односно до среда (28 ноември). Во рамки на манифестацијата ќе бидат организирани промоции, тематски средби, изложби и други интересни содржини за посетителите.