Се чекаат резултати од последните анализи на водата во Гостивар, првите мостри се исправни

Од петокот се вршат вонредни анализи на водата од градскиот водовод во Гостивар, откако претходно „Комуналец“ извести дека не е безбедна за пиење, поради присуство на бактерии.

И од претпријатието и од гостиварскиот Центар за јавно здравје, претпладнево добивме информација дека резултатите од првите земени мостри се микробиолошки и хемиско исправни. Се чекаат резултатите од останатите примероци земени викендов, кои најверојатно ќе се комплетираат утре.

„Земени се мостри три дена по ред, првите се исправни, а за останатите ги чекаме резултатите. Мислам дека утре веќе ќе ги имаме, за да се каже дефинитивно дали водата може да се користи за пиење“, рече д-р Берун Мустафа, специјалист по хигиена од Центарот за јавно здравје во Гостивар.

Од јавното претпријатие „Комуналец“ исто така очекуваат комплетни резултати во текот на утрешниот ден.

„Анализите од првите мостри покажаа дека водата е во ред, утре ќе ги знаеме резултатите за другите примероци. Инаку, водата во градскиот водовод редовно се хлорира“ , изјавија за Gostivarpress.mk од „Комуналец“ .

До конечните резултати останува препораката водата да не се користи за пиење.