Се чистат цевките на атмосферската канализација во Гостивар

Екипи почнаа да работат на чистење на цевките на атмосферската канализациона мрежа во Гостивар. Според најавите од локалната самоуправа, работите ќе траат во период од еден месец, а ќе биде опфатена траса во должина од 5 километри. Активностите се спроведуваат во рамки на проект со финансиски средства од грант на УНДП.

„Овој проект има за цел олеснување на протокот на атмосферската вода при врнежи од дожд и топење на снегот на градските улици, што би овозможило избегнување на непријатни состојби во сообраќајот и ќе биде мерка за полесно справување со случаите на поплави. Проектот ќе биде под постојан надзор од екипите на техничката служба на ЈП „Комуналец“ – Гостивар кои ќе се грижат за непречено одвивање на работите според трасата одредена во соработка со изведувачот на проектот.“, соопштија од општината додавајќи дека по завршувањето на работите на главната линија, ЈП „Комуналец“ ќе продолжи со чистење на секундарната линија на атмосферската канализација за да се постигнат оптимални услови во целата мрежа на атмосферска канализација.