Се‘ е подготвено за прослава на големиот празник Преображение во Гостивар

Православните верници од Гостивар и гостиварско со нетрпение и радост го очекуваат утрешниот празник Преображение Христово, кој традиционално се одбележува со голема прослава во манастирот во изградба „Свето Преображение“ во гостиварската населба Циглана.

Иницијативниот одбор изминатиот период работеше на организација на празнувањето, а  подготовките се веќе заокружени за Гостивар и годинава да има величествен настан во чест на Преображение.

По повод празникот утре во 9 часот Владиката г.Јосиф и свештениците од гостиварското архиерејско намесништво ќе извршат водосвет и благословување на грозјето, по што од 10 часот ќе следува народна веселба. Во очи празникот, вечерва со почеток во 20.30 часот се организира музичка вечер со Влатко Миладиноски.

Изградбата на храмот во Циглана напредува, а околу манастирот е подигнат 55 метри потпорен ѕид.

Преображение по својата смисла и значење е еден од централните христијански празници. Се базира на настанот на Христовото преобразување, односно покажување на неговата божественост пред своите најблиски ученици на Таворска Гора, кратко време пред неговото страдање во Ерусалим. Традициите налагаат на Преображение за прв пат да се јаде грозје, откако свештеникот ќе го благослови во знак на благодарност кон Бог за дадените плодови на земјата.