Се испитува составот на отпадот од полошките општини – Предвидени и итни мерки за депонијата Русино

Експертски тим започна со вршење на анализа на составот на отпадот, кој се собира во општините од полошкиот регион. Активноста е дел од проектот за управување со цврст отпад, а целта е изработка на Регионален план и Физибилити студија со конкретни мерки кои треба да се преземаат на ова поле.

Денес, во присуство на претставници од комуналните претпријатија од Полог, вработени во гостиварски Комуналец под водство на стручни лица, презентираа на кој начин се врши селекцијата на сметот, од која постапка понатаму се прибираат податоци.

„Тоа што денес го правиме овде е следно: го ставаме отпадот на масата за сортирање, која е конструирана на две нивоа, горно каде останува покрупното и долно ниво, каде паѓа поситното ѓубре. Потоа од горното ниво каде е поголемиот отпад го сортираме во различни канти, како на пример стакло, пластика, метал, органско ѓубре, хартија и отпад кој не може да се рециклира. Сето тоа се мери и потоа од добиените податоци можеме да создадеме една слика за составот на отпадот во полошкиот регион, а тоа е основната информација која ни треба за да развиваме технички можности за управувањето со отпадот согласно законските рагулативи.“, објасни експертот Александра Зелц.

Проектот предвидува и неколку краткорочни мерки, кои се дефинирани како итни.  „Се предвидува поставување на вага со целокупна опрема во Русино, нејзино оградување, соодветни мерки за собирање и третман на исцедокот и друго“, рече Филип Иванов, заменик тим лидер на проектот.   

Проектот за управување со цврст отпад во полошкиот регион се реализира со поддршка на Швајцарскиот секретаријат за економски работи, во соработка со Министерството за животна средина и просторно планирање.