Се испитува водата, екипи ќе го посетат и бачилото во Симница

Уште три лица од гостиварско со покачена температура, повраќање и пролив биле примени на Инфективната клиника во Скопје. Бројката на хоспитализирани од вчера порасна на вкупно седум. Новите случаи, иако ги имале истите симптоми, биле со полесна клиничка слика и не се загорзени по живот, информираа од Министерството за здравство.

На Инфективното одделение во гостиварската болница од утрово нема дополнителни пациенти. Надлежните велат дека чекаат официјални резултати, па ќе излезат со информација. Освен други испитувања на терен, биле земени и мостри на вода од локалниот водовод од кој Симница се снабдува со вода за пиење. Екипи ќе го посетат и бачилото на семејството на починатите татко и син, за да се направат увиди и анализи на тамошната состојба.