Се менува Законот за финансиска дисциплина – Ќе се намали казната за доцнење на исплата

Законот за финансиска дисциплина кој се наоѓа во собраниска процедура, ќе претрпи измени во делот на надоместокот за доцнење при исполнување на парични обврски.

Поточно се намалува надоместокот за доцнење и се пренесува надзорот над спроведување на одредбите за деловни трансакции од страна на економските оператори од приватниот сектор од УЈП на ДПИ при Министерството за економија.

Причина за предложените измени, како што стои во образложението од предлагачот, е натамошно усогласување со ЕУ директивите, односно се допрецизира дека должникот треба да ги исполнува своите парични обврски во договорените рокови без претходно потсетување и опомена од страна на доверителот.

Согласно Законот доколку паричната обврска не е исполнета во договорениот рок, доверителот има право да наплати надоместок за доцнење од должникот во износ од 3.000 денари. Со цел усогласување со висината на надоместокот утврден во Директивата, се предлага намалување на истиот од 3.000 денари на 2.400 денари. Исто така, се врши натамошно усогласување со Директивата, односно се допрецизира дека должникот треба да ги исполнува своите парични обврски во договорените рокови без претходно потсетување и опомена од страна на доверителот.