Се одбележува Задушница во спомен на починатите

Православните христијани денес и утре одбележуваат Задушница, во спомен на починатите од семејството. Се посетуваат нивните вечни почивалишта, а црквата налага на гробот да се принесе пченица, лепче, вино, да се запали свеќа и да се повика свештеник со кој се споменуваат имињата на блиските покојни. Кај граѓаните останал обичај уште од минатото да се носи и раздаваат храна „за душа и покој“.

Во недела се празнува Духовден, празник кој го означува слегувањето на Светиот Дух врз апостолите. Празникот уште се вика и Света Тројца затоа што на едно место се јавуваат Таткото, Синот и Светиот Дух. Со одобрение на Богот-таткото се исполнило ветувањето на Богот-син, дадено пред апостолите дека ќе им го испрати Светиот Дух. Со слегувањето на Светиот Дух врз апостолите, тие се исполниле со љубов кон Бога и со желба да го величаат. Овој чин се смета за основање на Христијанската црква.