Се прават вонредни анализи на водата во Гостивар

По вчерашното известување од ЈП „Комуналец“ дека во водата од градскиот водовод во Гостивар се пронајдени бактерии и не е безбедна за пиење, екипа од гостиварското одделение на Центарот за јавно здравје утрово зема примероци за вонредни анализи.

Редовните анализи на водата ги врши приватна лабараторија со која Комуналец има склучено договор. Центарот за јавно здравје, вонредните ги прави по службена должност.

„Откако добивме информација дека водата не е безбедна за пиење, правиме вонредни анализи. Излезени сме на терен и ќе земаме примероци од четири мерни места, едно од изворот во Вруток и три од различни локации во градот. Утрово утврдивме дека водата е хлорирана и за сега толку може да кажеме. Резултати ќе има во понеделник“, информираше за Gostivarpress.mk, д-р Берун Мустафа, специјалист по хигиена од Центарот за јавно здравје во Гостивар.

Како што појаснува д-р Мустафа, за да може водата да се одобри за пиење, три последователни анализи мора да бидат со исправни резултати.

Вчера попладне, ЈП „Комуналец“ излезе со соопштение дека водата од градскиот водовод микробиолошки не е безбедна за пиење. Микробиолошките тестови откриле присуство на колиформни бактерии и ешерихија коли (E. coli), кои можат да претставуваат сериозни здравствени ризици.