Се шират морбилите во Гостивар, заболени уште шест лица

Регистрирани се нови случаи на мали сипаници (морбили) на подрачјето на Гостивар. Институтот за јавно здравје, денес го објави најновиот извештај за состојбата со болеста, кој ги опфаќа деновите од 23 до 29 март.

Според податоците, во Гостивар има шест новозаболени од морбили. Од нив пет се невакцинирани, непотполно вакцинирани или со непознат вакцинален статус. Со новите случаи, Гостивар достигна бројка од вкупно 15 заболени.

Од почетокот на епидемијата во Скопје, во декември 2018 заклучно со денес (29 март), во земјава се регистрирани 767 случаи на мали сипаници. Според место на постојано живеење, случаи на мали сипаници се регистрирани во 20 градови, од кои 521 случај од Скопје, 63 од Тетово, 61 од Куманово, 27 од Струга, по 18 случаи има во Гевгелија и Дебар, 15 се од Гостивар, 12 од Велес, 11 од Кичево, по четири од Кочани и од Штип а во останатите девет градови се регистрираат спорадични случаи.

Активни епидемии на мали сипаници во моментот има во шест здравствени региони (Скопје, Тетово, Куманово, Гевгелија, Кичево и Струга).