Се слави 11 Октомври, 81 година од почетокот на антифашистичкото востание

Македонија денес одбележува 81 година од почетокот на антифашистичкото востание. Празникот 11 Октомври е Ден на народното востание и Ден на борецот. Со одлуката да пристапи кон антифашистичката коалиција државава застана на страната на прогресивното човештво, а против фашизмот како најтемна идеологија од современата историја и најсилна негација на општоцивилизациските и демократски вредности.

Организираното востание на македонскиот народ против окупаторите за ослободување на земјата започнало на 11 октомври 1941, кога Првиот прилепски партизански одред ја нападнал бугарската полициска станица Участок и телефонско-телеграфската мрежа во Прилеп. Во нападот учествувале 16 партизани, распределени во три групи. Ослободителните дејствија продолжиле на 12 октомври во Куманово каде во областа Студена вода бил формиран Кумановскиот (Козјачки) партизански одред, а во областа Менкова колиба, Карадачкиот одред.

Од првите партизански одреди кои ја почнале борбата, Народноослободителната војска на Македонија на крајот од четиригодишната војна прераснала во добро организирана 110-илјадна армија со воени формации од највисок ранг.Круна на борбата се одлуките на Првото заседание на АСНОМ во 1944 година, со кои се оживотворени повеќевековните идеали за основање македонска држава.

Во текот на НОБ од Гостивар и гостиварско своите животи ги дадоа 322 борци и 158 жртви во борбите за слобода од сите националности, Македонци, Албанци, Турци и други. Гостивар и гостиварско дадоа пет народни херои, Чеде Филипоски Даме, Панче Попоски, Видое Смилевски Бато, Тихомир Милошески Тиќо и Злате Малакоски.