Се слави Св.Марина – Огнена Марија

Православните верници ја чествуваат Св. великомаченица Марина, празник кој меѓу народот е познат како Огнена Марија. Оваа светица потекнува од семејство кое не било религиозно. Таа ја спознала љубовта кон Исус Христос на свои 12 години и се заветила дека никогаш нема да се мажи, туку ќе се посвети на добри дела и на Господ. Татко ѝ ја замразил заради нејзината вера и не ја сметал повеќе за ќерка. Кога царскиот намесник Олимвриј дознал дека е христијанка, побарал од неа да му биде жена. Кога го одбила, ја подложил на маки и во болка и рани ја фрлил во затвор. Наредниот ден била  мачена во оган и во вода, но Марина претрпела сѐ. На крај била осудена на смрт со меч.

Огнена Марија се почитува како борец за христијанската вера и заштитничка на жените. Според народното верување, таа пали и казнува со огин и спаѓа во огнени светци. Обичајот за празникот вели дека поради големата жештина горат небото и земјата и ништо не треба се работи. Во преданијата се наведени примери кога на луѓето кои работеле на овој празник од оган и громови им биле запалени житото, сеното и домовите.