Се судриле три возила на патот Гостивар-Тетово, има повредени

Вчера (3 јануари) околу 17 часот, во СВР Тетово пријавено е дека се случила сообраќајна несреќа на автопатот Гостивар-Тетово, во близина на клучката за Жеровјане, а во која учествувале три патнички моторни возила: „ауди“ со хрватски национални ознаки управувано од 48-годишниот Ф.А. од тетовски Пирок, „мерцедес“ со гостиварски ознаки што го управувал 20-годишниот Б.А. од гостиварско Сенокосе и „опел“, исто така, со гостиварски ознаки, управуван од 55-годишниот М.А. од тетовско Боговиње.

Во несреќата, 32 годишната сопатничка од „опелот“, се здобила со тешки телесни повреди, а возачот и уште еден сопатник од истото возило се здобиле со телесни повреди од полесен карактер, констатирани во тетовската Клиничка болница, каде биле пренесени за укажување на лекарска помош. На местото на несреќата увид извршила екипа од Секторот за внатрешни работи Тетово.