Се врши обнова на старата џамија во Равен, ќе се работи и во црквата „Св. Димитрија“ во Гостивар

Старата џамија во гостиварско Равен ќе биде целосно обновена и отворена до крајот на следната година, најави министерот за култура и туризам, Зоран Љутков при денешната посета на Гостивар. За зафатите во џамијата министерството годинава обезбеди 1,5 милиони денари.

„Овде е интервенирано претходно повеќепати. Сега се работи на дрвената конструкција, на подот и уште неколку зафати и се надевам до крајот на 2026-та година со уште една мала интервенција во партерното уредување и дел во минарето старата џамија ќе биде готова и отворена.“, кажа Љутков.

Министерот за култура и туризам заедно со својот заменик Седат Сулејмани, при посетата на Гостивар, беа и во црквата Свети Димитрија.

„Ја посетивме и црквата Свети Димитрија која е од 1840-та годин и за која издвоивме 300.000 денари, наменети за замена на прозорите. Исто така, ја посетивме и Саат Кулата, Беговата куќа која е симбол на стара градска архитектура и каде ќе имаме доста интервенции, како и куќата на Ахмед Чаку која за жал е опожарена, но сепак домаќините ги отворија вратите и бевме запознаени со ситуацијата. Морам да кажам дека Гостивар има многу споменици на културата и ние како Министерство за култура и туризам ќе интервенираме во наредните години доволно во Гостивар, за освен како град на културни установи, стане и град на туризмот“, рече министерот.

При денешниот престој во Гостивар, Љутков ги посети националните установи од областа на културата и оствари средби со раководствата.