Седум намирници кои треба да ги внесуваме за да ни се зајакне имунитетот

Нашиот имунолошки систем е првата линија на одбрана од штетните патогени кои можат да придонесат за развој на акутни и хронични болести. Тоа е широка мрежа на органи, клетки и протеини кои работат заедно за да го заштитат телото од вируси, бактерии, габи и други микроорганизми. А доколку „напаѓачите“ навлезат во телото и предизвикаат штета, имунолошкиот систем е одговорен да ја залечи таа штета и да се прилагоди на идните зaкани.

Постојат многу начини за зајакнување на вашиот имунолошки систем, вклучувајќи редовно вежбање и квалитетен сон. Сепак, исхраната – со акцент на одредени хранливи материи исто така игра значајна улога. Еве кои намирници се најдобри за здравјето на имунолошкиот систем:

Цитрусните овошја

Цитрусите се богати со витамин Ц, хранлива материја која е важна за здравјето на имунолошкиот систем. Витаминот Ц, или аскорбинска киселина е витамин растворлив во вода кој е од суштинско значење за раст и поправка на ткивото. Како антиоксиданс, витаминот Ц се бори со слободните радикали, што помага во спречување на одредени видови на рак, срцеви заболувања и други хронични здравствени проблеми. Со оглед на тоа дека нашето тело не може да произведе витамин Ц, треба да го внесуваме преку исхраната. Цитрусното овошје може да се консумира свежо или како состојка во различни јадења.

Јогурт

Многу истражувања покажаа дека постои врска помеѓу здравјето на цревата и општото здравје. Јадењето храна како јогурт, богат со пробиотици, може да го зголеми бројот на добри бактерии во цревниот микробиом, што на крајот придонесува за зајакнување на имунитетот. Грчкиот јогурт е особено корисен за имунолошкиот систем бидејќи обезбедува висококвалитетни протеини и помага во разновидноста на бактериски соеви во цревата.

Јаткасти плодови

Јаткастите плодови се одличен извор на цинк – хранлива состојка клучна за здрав имунолошки систем. Јаткастите плодови, како што се индиските ореви, бадемите и оревите, се одличен извор на цинк, па затоа се препорачува што почесто да ги додавате во исхраната. Јаткастите плодови се практична и здрава ужина која може да се земе насекаде или да се додаде во различни јадења.

Ѓумбир

Многу истражувања сугерираат дека ѓумбирот може позитивно да влијае на здравјето на имунолошкиот систем. Има антиоксидантни и антиинфламаторни својства, па може да помогне да се намали ризикот од хронични здравствени проблеми, како што се кардиоваскуларни болести. Истражувањата покажаа дека ѓумбирот ги блокира проинфламаторните цитокини и ги потиснува оксидирачките молекули кои придонесуваат за воспаление во телото. Ѓумбирот лесно може да стане дел од урамнотежена исхрана, а најдобар избор е свежиот ѓумбир, кој  има најсилни ефекти врз здравјето на луѓето.

Куркума

Овој горчлив зачин содржи биолошки активно соединение познато како куркумин кое работи со клетките на имунолошкиот систем за да ги подобри одбранбените способности на телото. Неговите гастро-заштитни, антиинфламаторни и антиоксидантни својства ги потиснуваат метаболичките патишта кои предизвикуваат воспаление и оксидативен стрес во телото. Кулинарските можности на куркумата се бескрајни. Може да се додаде во супи, чорби, смути, овесни снегулки, маринади, па дури и чаеви.

Лук

Лукот е еден од најпознатите „природни антибиотици“ и долго време се користи во медицински цели бидејќи содржи бројни важни соединенија кои се клучни за правилно функционирање на имунолошкиот систем. Овие биолошки активни соединенија придонесуваат за различни биолошки процеси во телото преку нивните антибактериски, антиинфламаторни, антиоксидантни и невропротективни својства. Тоа е вкусен додаток на различни јадења.

Други начини за зајакнување на имунитетот

Исхраната игра клучна улога во одржувањето на здрав имунолошки систем. Сепак, за максимална функционалност на имунолошкиот систем, потребни се и:

Добра рутина за спиење

Квалитетниот сон е од суштинско значење за одржување на силен имунитет бидејќи му дава шанса на телото да се одмори и да ги замени важните клетки кои се борат против инфекцијата. Недостатокот на сон е поврзан со хронично воспаление и зголемен ризик од инфекција. Возрасните треба да спијат најмалку 7 часа навечер за да го оптимизираат здравјето на имунолошкиот систем.

Редовна физичка активност

Физичката активност поддржува здрав имунолошки систем на неколку начини. Редовната физичка активност може да помогне да се намали анксиозноста, да се поддржат напорите за управување со тежината и да се подобрат моделите на спиење.

Управување со стресот

Иако се потребни повеќе истражувања, сегашните студии покажуваат дека зголеменото ниво на стрес може да биде поврзано со дисфункција на имунолошкиот систем. Стресот е широк поим кој може да варира кај поединци. Сепак, техниките за управување со стресот, како што се јогата и медитацијата, можат да помогнат во ублажување на симптомите на стрес.