Седум предупредувачки знаци за висок шеќер во крвта

Високиот шеќер во крвта може да биде тивок проблем, кој долго време останува незабележан. Особено кај луѓето со преддијабетес или рани фази на дијабетес тип 2, симптомите може да бидат суптилни или да се препишат на секојдневниот замор и стрес. Сепак, телото испраќа сигнали кои не треба да се игнорираат.

Постојана жед и често уринирање

Чувството на ненаситна жед е еден од првите знаци дека нивото на шеќер во крвта е зголемено. Бубрезите се обидуваат да се ослободат од вишокот гликоза, што доведува до зголемено излачување на урина. Како резултат на тоа, телото ја губи неопходната течност, предизвикувајќи постојана потреба за вода.

Непрекинат глад

Иако внесувате доволно храна, чувството на глад не исчезнува. Причината лежи во тоа што гликозата не може ефикасно да влезе во клетките и да се искористи како извор на енергија. Ова води до постојана потреба за храна, што понекогаш може да биде придружено со неочекувано губење на тежина.

Заматен вид

Високото ниво на шеќер во крвта може да влијае на малите крвни садови во очите, предизвикувајќи заматен вид. Овој симптом може да биде привремен, но ако се игнорира, може да доведе до сериозни оштетувања на мрежницата.

Хроничен замор и исцрпеност

Без доволно енергија, телото брзо се изморува. Недостатокот на инсулин или неговата неефикасност значи дека клетките не добиваат доволно гориво, што води до чувство на исцрпеност дури и по добар одмор.

Чести инфекции на уринарниот тракт

Истражувањата покажуваат дека луѓето со висок шеќер во крвта имаат поголема веројатност да развијат уринарни инфекции. Вишокот шеќер во урината создава поволна средина за размножување на бактерии, што ја зголемува склоноста кон инфекции.

Промени на кожата

Темни дамки во наборите на кожата – на вратот, под пазувите, на прстите или препоните – може да бидат ран знак за дијабетес или инсулинска резистенција. Покрај тоа, чести се кожните израстоци, инфекции, сушење и чешање на кожата.

Други знаци што не треба да се игнорираат

Освен овие симптоми, може да се појават и други, како што се губење на косата, сува уста, рани кои тешко зараснуваат, трнење во екстремитетите и сл.

Ако забележите некој од овие симптоми, важно е да се консултирате со лекар. Раното откривање и управување со нивото на шеќер во крвта може да спречи посериозни компликации и да го подобри квалитетот на животот.