Сеќавање на гостиварските херои, учесници во Февруарскиот поход

Гостивар им одаде почит и се присети на херојството на учесниците во Февруарскиот поход, еден од клучните военостратегиски историски настани од периодот на народно ослободителната војна на Македонија. Седумдесет и три години од борбените операции, беа одбележани со пригоден собир и положување на цвеќе, што го организираше општинскиот одбор на Сојузот на борци во Гостивар.

Членови на организацијата, претставници на политички партии, ученици, почитувачки на слободарските традиции беа дел од денешниот настан, во чест на Февруарскиот поход.

За целта, текот и значењето на оперативните дејствија пригоден реферат прочита Тања Карафилоска, професор по македонски јазик во економското училиште.

Гостивар дал значаен придонес во Народноослободителната војна на Македонија. Во Февруарскиот поход од 1944 година, учествувале 40 борци од гостиварскиот регион, а неколку од нив го загубиле животот во борбата против окупаторот и тоа: Злате Малакоски, Васил Василески, Борче Јованоски, Крсте Гиноски, Слободан Пепоски, Светозар Спироски и Денко Дејаноски.

            Одбележувањето на годишнината од Февруарскиот поход се заокружи со положување на цвеќе пред споменикот на народниот херој Чеде Филипоски-Даме, на градскиот плоштад.

Во рамките на операциите на големиот Февруарски поход се подразбираат борбените дејства што ги изведуваат единиците на НОВ и ПОМ од 31 јануари до 24 февруари, 1944 година, кои според интензитетот, целите, начинот на изведувањето и постигнатите резултати, носат белег на исклучително важни историски, политички и воени настани.