Секој ден по 6 часа прекин на сообраќајот на патот Галичник-Маврово

На регионалниот пат што ги поврзува Галичник и Маврово, сообраќајот во наредниот период ќе биде во прекин секој ден по шест часа. ЈП „Македонија Пат“ почнувајќи од денес (14 август) ќе изведува градежни работи (асфалтирање) на патот.

„Асфалтирањето ќе се одвива во правец од Галичник према Маврово. Работите ќе се одвиваат секој работен ден и за време на викенди во период од 10.00 – 16.00 часот при што сообраќајот ке биде во прекин. На место на работите ќе биде поставена соодветна сообраќајна сигнализација.“, информира Автомото Сојузот на Македонија.

Од Месната заедница на Галичник нагласуваат дека зафатот е од голем аважност за животот и унапредувањето на туризмот во селото.

„Потсетуваме дека после 47 години, кога патот се градел во функција на ревитализација на Галичник, ова е трет сериозен зафат на овој дотраен асфалт, после зафатот на делот кај Царевец направен пред повеќе од 20 години и санацијата на свлечиштето која заврши пред два дена. Свесни сме дека работите се изведуваат во ек на туристичка сезона, но потсетуваме дека тоа е истовремено и единствена градежна сезона за овој тип работи и на оваа локација. Убедени сме дека за животот во Галичник и унапредувањето на туризмот, овој зафат е од исклучителна важност. Затоа, ве молиме за трпение и соработка во периодите во кои ќе се одвиваат работите“, соопшти МЗ Галичник.

Во врска со состојбата на останатите патишта, АМСМ информира дека сообраќајот се одвива непречено, по претежно суви коловози. Интензитетот на сообраќај на патните правци надвор од градските средини е умерен. АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.