Семејна драма: Татко пукал во синот кој го нападнал со секира

Триесет и тригодишен гостиварец завршил во болница со прострелна рана, откако неговиот татко пукал во него. Немилиот настан се случил претпладнево во куќа на ул„205“ во Гостивар.

Според првичните непотврдени информации, таткото на возраст од 57 години и синот најпрво имале куса вербална расправија во својот дом, по што синот го нападнал таткото со секира. Тогаш, таткото извадил пиштол и испукал еден куршум кон него, при што го ранил во левата рака. Повредениот бил пренесен во гостиварската болница, кадешто му била пружана лекарска помош и е надвор од животна опасност.

Таткото набрзо по настанот бил лишен од слобода, му била земена парафинска ракавица, а оружјето со кое пукал е предадено на вештачење.

По овластување на јавен обвинител, увид на местото извршила полициска екипа од каде информираат дека се работи на утврдување на деталите и расчистување на настанот.