Семејно насилство во Гостивар – 6 случаи со телесни повреди, пријави и за психичко малтретирање

Во првите три месеци од оваа година на подрачјето на СВР Тетово регистрирани се вкупно 34 кривични дела поврзани со семејно насилство, од кои 26 на тетовското и 8 на гостиварското подрачје. Најголемиот број од кривичните дела-20 биле со нанесување на телесни повреди. Во Тетово такви случаи се 14, додека во Гостивар 6. Во едно од кривичните дела во Гостивар утврдена е повреда на семејни обврски.

„Сите дела целосно се расчистени и заокружени со соодветни поднесоци. Најмногу од сторителите на овие дела, односно од извршителите на семејното насилство во периодот за кој станува збор биле машки лица, претежно сопрузи, вонбрачни или поранешни сопрузи, потоа деца, родители и така натаму, додека меѓу „жртвите“ на ваквиот вид насилство најбројни се сопругите и татковците. Најчести причини за насилството и годинава се нервните растројства и болестите на зависност, пред се алкохолизмот.“, соопштува СВР.

Во првиот годинашен квартал до Секторот за внатрешни работи Тетово, исто така, биле поднесени и 65 поплаки кои се однесувале на семејно насилство, од кои во Тетово 48, а во Гостивар 17. Најмногу од оние на тетовското подрачје се поплакувале за физичко малтретирање, а на гостиварското за психичко и економско малтретирање. Сите поплаки се адекватно расчистени со поднесоци, информира полицијата.