Семејство со мало дете – Фаза на донесување многу важни одлуки

Оваа фаза започнува со бременоста, раѓањето на првото дете до неговата тригодишна возраст. До раѓањето на детето мажот и жената ја имаат улогата на брачни партнери. Со раѓањето на детето тие добиваат и нова улога, улога на родители. Во оваа фаза брачниот пар станува семејство.

За време на оваа фаза брачните партнери треба да ја учат и родителската улога и да донесуваат важни одлуки:кој ќе се грижи за детето, кој што ќе работи, дали ќе прифатат помош од родителите како ќе се распореди работата во семејството…Кога детето ќе наполни една година почнува процесот на воспитување. Родителите треба да се договорат кој ќе биде авторитет за детето, дали носител на авторитетот ќе биде мајката, таткото или двајцата. Ова е важно заради структурата во семејството, а особено во однос на хиерархиската поставеност. Доколку родителите се борат за наметнување на силата и авторитетот, како меѓу себе така и со своите родители кај детето ќе создадат конфузија и недоумица кое и чие правило треба да почитува и прифаќа.

За овие прашања партнерите треба отворено да разговараат и да постигнат договор околу решенијата на спорните елементи. Раѓањето на детето бара реорганизација и воспоставување на нова семејна структура во односите кон членовите на примарните семејства. Родителите на партнерите добиваат нова улога на баба и дедо. Кај нив се јавува уште поголема желба да бидат  во функција и од корист на своите деца. Тоа е добра позиција доколку младиот пар го прифаќа и доколку улогата на членовите на примарното семејство е конструктивна и добонамерна, а не во функција на докажување на неспособнота и некомпетентноста на младиот родител.

Во фазата на транзиција на семејниот систем, дедовците и бабите би трбало да бидат понастрана и да им дозволат на новите родители да бидат родителски авторитет. Никој при тоа не би тебало да им пречи при воспоставување на нов тип односи со своите внуци. За многу баби и дедовци тоа е пријатен период  шти нуди блискост без сите оние одговорности кои ги бара родителството. И останатите членови на поширокото семејство може да бидат од голема помош за олеснување на влезот во родителството со пренесување на знаење и искуство, давајќи им притоа безрезервна, практична и емоционална поддршка на родителите.

Напнатоста околу раѓањето, преземањето на родителската улога, промените во односите меѓу родителите, може да доведе, оваа фаза во животниот циклус на семејството да биде критична со висок кризен набој или потенцијал. За тоа сведочи искуството од голем број на разводи токму во оваа фаза.

На младото семејствотрба да му се овозможи да ги најде сопствените механизми потребни за исполнување,како на личните така и на семејните цели. Тука се мисли на професионалната афирмација и на кариера кај младите партнери, односите со пријателите и роднините, самостојноста во одлучувањето, развивањето на одговорност во врска со исхраната, заштитата, грижата и љубовта кон детето. На тој начин младото семејство може да го подигне квалитетот на живеење, а при тоа да ги задржи добрите односи со роднините и пријателите.

(Следува Семејство со предшколско дете и школско дете)

пишува: м-р Слаѓана Ангелкоска, психолог

Советувалиште за брак и семејство

Центар за социјална работа Гостивар