Крајно сериозна состојбата со ковид во Гостивар: 50-тина хоспитализирани, редици за тестирање…

Регионот на Гостивар станува ново жариште на коронавирус. Болничките капацитети се полнат со пациенти на кои поради компликации им е неопходна хоспитализација. На инфективното и на интерното одделение во гостиварската болница од ковид се лекуваат 50-тина лица со средно тешка и тешка кличинка слика. Пациенти амбулантски се лекуваат и во објектот на поранешна дијализа.

„Одделението е преполно, имаме неколку пациенти кои се на кислородна поддршка, останатите се со средно-тешка состојба. Праќаме и на интерно, полесните ги третираме на дијализа, тие примаат терапија се враќаат дома, па утредента повторно доаѓаат по терапија. Таму имаме осум кревети. Повеќето хоспитализирани пациенти се над 60 години, со коморбидитети, помалку имаме помлади пациенти. Ние колку што можеме се бориме за секој пациент, заедно со екипата. Апелот до граѓаните секогаш е ист, да се носи маска, да се одржува дистанца и редовна хигиена. Тоа мора да се почитува, ситуацијата е сериозна“, изјави д-р Ратко Наумоски, раководител на инфективното одделение во Гостивар.

Епидемиолошката служба е преплавена со граѓани коишто се тестираат за коронавирус. Утрово пред влезот имаше голема редица на пациенти препратени од матичните лекари за тест поради симптоми, како температура, кашлање и слично. Веќе започна и тестирање со брзи ковид антигени тестови, кое се спроведува од страна на Здравстениот дом, во објектот на Трудова медицина.

Бројката на активно болни во општините Гостивар, Врапчиште и М.Ростуше моментално е 639. Вчера беа регистрирани рекордни 84 новозаразени.