Шахот да влезе во секое училиште! Обуки за наставниците во Гостивар

Наставен кадар заинтересиран да предава на часовите по шах во училиштата во Гостивар, денес учествуваше на обука организирана од Шаховската федерација на Македонија и МОН, во соработка со гостиварскиот Шаховски клуб и локалната самоуправа.

Шахот од оваа учебна година се вметнува како изборен предмет во основните училишта за децата од прво и второ одделение, а потоа и во четврто и петто. На обуката наставниците имаа можност да се запознаат што се‘ е предвидено во програмата за работа на часовите.

„Ние ги обучуваме наставниците што е предвидено да има на тие наставни часови. И не само на ваквите обуки, туку стоиме на располагање постојано за информации, едукација и поддршка. Исто така, наставниците може да бараат помош и од шаховските клубови. Се надеваме дека шахот ќе влезе во секое училиште, а ние ќе дадеме се‘ од себе за тоа да се случи. Целта ни е децата да ја развиваат интелигенцијата, своите способности, да ги  научиме децата дека треба да имаат трпеливост, концентрација и добро да ги анализираат околностите пред да „повлечат потег“, изјави потпретседателот на Шаховската федерација, Агим Шемшиу.

На настанот присуствуваше и раководителката на општинскиот Сектор за образование, Аслијан Снопче, која во оваа прилика истакна дека општината ја дава својата поддршка на наставниците кои ќе одберат да се вклучат во наставата по шах и да ги мотивираат децата да го изберат како предмет.

Вакви обуки се спроведуваат и низ другите градови во земјава.