Шанса за нов живот: Тинејџери од Гостивар запоставени од родителите згрижени во мал групен дом

Тинејџери од Гостивар, кои растеле во нефункционално семејство, без доволно грижа од родителите добија шанса за нов живот. Со ангажман на тимот од Центарот за социјална работа, девојчето и момчето се сместени во мал групен дом во Скопје. Таму ги имаат сите услови за нормално секојдневие, за учење, дружење и поддршка да си ја планираат иднината.

Во групниот дом живеат во заедница со други деца и имаат свои воспитувачи, кои им помагаат да развијат чувство на стабилност и припадност.

„Сместивме момче од 15 и девојче од 16 години, од причина што немаа животни услови, доволно родителска грижа, а сакаат да се школуваат, имаат капацитет за напредување. Сега имаат поубави услови, згрижени се како што треба, со целото внимание и поддршка. Така децата ќе може имаат едно нормално детство, младост и да си ги остварат целлите и желбите“, вели Билен Карахасан, психолог во Центар за социјална работа – Гостивар.

Секоја година, од Гостивар во мали групни домови се згрижуваат максимум 3 деца. Искуството на социјалните служби кажува дека потребите се многу поголеми.

„Потребите се поголеми. Никој во нашата држава не се занимавал со тоа да истражи колку има такви случаи. Никој не дошол во Гостивар, ете да не консултира околу проблемот.  Тоа порано за време на бивша Југославија се работело, едноставно да се знае која и каква е реалната слика. Само така вистински може да се помогне. А тоа би бил еден многу едноставен процес, како сите дома што правиме, гледаме што ни треба, правиме проценка, калкулации, планови“, рече психологот.

Според прописите децата остануваат во групните домови до 18 годишна возраст. Потоа од државата им се обезбедуваат по 3.000 евра како поддршка за запишување на факултет, изучување занает или вработување.