Шефот на ОБСЕ Клеменс Која во посета на Општина Гостивар

Состојбите во Општина Гостивар, актуелните политички збиднувања во земјава, и евроинтеграциите беа едни од темите на разговор меѓу шефот на мисијата на ОБСЕ, Клеменс Која и градоначалникот Арбен Таравари, на денешната официјална средба во  гостиварската општина.

„Му се заблагодарив на амбасадорот Која за поддршката што Мисијата на ОБСЕ ја дава на Северна Македонија, со надеж дека успешната соработка со нив ќе продолжи и во иднина, за реализација на низа заеднички проекти за што побрза интеграција во Европската Унија. Амбасадорот Која од своја страна ни честиташе за локалните избори во Гостивар со желба да имаме успешен мандат во наредните четири години. Зборувавме за Советот на Гостивар, мнозинството, следните проекти кои ни се планирани, за Владата, евроинтегративниот процес на земјава, нашите прогнози за тоа што ќе се случува на политички план наредните месеци и друго“, истакна по средбата градоначалникот Таравари.