Шелтер центарот во Гостивар спас за жртвите на семејно насилство, донациите добредојдени

Речиси една година во Гостивар функционира шелтер центарот за жртви на семејно насилство, кадешто малтретирани и напаѓани жени ја добиваат потребната помош и поддршка. Засолништето, кое го води Центарот за женски права ЕТИКА-Гостивар е прво и единствено од таков тип во полошкиот регион, а има капацитет за згрижување на осум лица.

„Моментално во шелтерот се сместени три лица, но кај нас бројот секогаш се менува и  има нови лица кои се обраќаат за помош. За жал бројот постојано расте и речиси сите од нив доѓаат со деца. Освен згрижувањето, со жените работи стручна екипа од психолог, педагог, социјален работник. Нашата цел е да се рехабилитираат, да ја најдат силата во себе и да можат да се вратат како нови во животот. Истовремено во соработка со други институции им помагаме и да најдат работа и да можат да продолжат со животот самостојно.“, вели Себајете Зенку, претседателка на ЕТИКА.

Шелтер центарот денеска доби донација во пакети со долготрајна храна и средства за хигиена за потребите на жртвите.

„Компанијата „Бехтел и Енка“ обезбеди значителна количина на хигиенски средства и храна. Донацијата е по иницијатива на вработените и на целиот тим на компанијата и ние изразуваме благодарност за тоа. Поддршката и помошта се добредојдени за шелтерот“, рече Зенку.

На гостиварско подрачје годишно се регистрираат и до педесетина кривични дела врзани со семејно насилство, при што најчесто жртви се жените.