Шеснаесетгодишната гостиварка Ангела објави прво книжевно дело

„Пат од кој нема откажување” е насловот на книгата со кој младата Ангела Арсеска од Гостивар дебитира на македонската книжевна сцена. Се работи за роман поделен во 14 прозни целини подредени по временски редослед и посебни наслови.

„Накратко може да кажеме дека во “Пат од кој нема откажување” ретроспективно се раскажува за несреќата на осум годишното девојче со име Анна, за болките страдањата и искушенијата во еден долг процес на закрепнување. Но, пред се, се раскажува за истрајноста и силата кој се собрани во  детската душа, надополнети со силната желба да се успее да ги оствари своите цели“, открива Ангела.

Авторката има само 16 години. Вели дека спортот, односно фудбалот и кошарката и биле прва љубов, но сега е насочена кон пишувањето и читањето. “Инспирација наоѓам во се што е околу мене, најмногу животните приказни и стории кои имаат пресврти како што беше донекаде и мојата од која може да се научи многу и да се согледа многу и секако мојот живот кој сакам да го претставам на некој свој начин, но секако реален и разбирлив за читателот. Што се однесува до прашањето – какви книги читам, може да кажам дека ги сакам романсите но сепак не ми се едни од омилените, доколку би бирала сепак би избрала трилер затоа што донекаде тоа е и стилот кон кој се стремам да пишувам во иднина.

Ангела Арсеска е родена 2004-та година во Гостивар и е средношколка во гостиварската гимназија. Книгата „Пат од кој нема откажување” е издадена од издавачката куќа Македонија презент.