ШК Гостивар победи во првото коло на државното екипно шаховско првенство I лига

Од денес (14 октомври) до 20 октомври во Струга се одржува државното екипно првенство во шах прва лига, на кое настапува и Шаховскиот клуб „Гостивар“. Во првото коло, гостиварци извојуваа победа над ШК „Куманово“ со резултат 3,5 : 2,5.

„Цела година се подготвуваме за ова првенство, самото учество е многу значајно за нас. Ова е прва лига, победникот е шампион на Македонија. Минатата година освоивме второ место, а оваа година се надевам на пласман помеѓу првите три екипи.“, изјави за Gostivarpress.mk, претседателот на ШК Гостивар, Воислав Мерџаноски.

Екипата на Гостивар ја сочинуваат: Душан Стефаноски, Ацко Стојкоски, Воислав Мерџаноски, Ндерим Сарачи, Мариан Петров, Петар Дренчев, Ванчо Стаменков, Сашо Симјаноски и Хедон Мифтари.

Државниот шампион ќе се знае по одиграни седум кола. Првенството е во организација на Шаховската Федерација на Македонија.