Синдикатот пријави над 100 газди кои не исплатиле К-15

Сојузот на синдикати на Македонија информираше дека поднеле пријави за повеќе од 100 газди кои воопшто не исплатиле или исплатиле помалку К-15 на работниците за 2020 година.

„Бараме одговорност и целосна примена на член 166 став 1 од Кривичниот законик за сите работодавачи кои свесно го прекршиле ова работничко право. Доколку биде потребно ќе бараме одговорност и од надлежните инспектори и ќе ги објавиме документите со кои располагаме ако не бидат санкционирани сите кои го прекршиле ова работничко право“, соопшти ССМ.

Од синдикатот потсетуваат на законските регулативи за повреда на правата од работен однос:

„Тој што свесно не се придржува кон закон, друг пропис или колективен договор, за засновање или престанок на работниот однос, за платата и надоместоците на платата, работно време, одморот или отсуството, заштитата на жената, младината и инвалидите или за забрана на прекувремената или ноќната работа и со тоа повреди, одземе или ограничи право што на работникот му припаѓа, ќе се казни со парична казна или со затвор до една година.“