Сите кои патувале во комбето со заразената жена вечерва во домашна изолација

„Идентификувани се сите патници коишто патувале со жената. Станува збор за комбе во кое биле 9 луѓе, 8 патници и возач. Идентификувани се на две места во Скопје, заедно со роднините на пациентката и на три места во Струмица. Веќе се упатени екипи за да се направи соодветната анкета за дознавање на податоци со кои се` лица овие патници комуницирале во текот на денот.  Вечерва сите ќе останат во домашна изолација, со полициски надзор, според протоколите. Врз основа на податоците, утре ќе се одреди дали ќе се продолжи со домашна изолација или ќе бидат префрлени во претходно одредените инфективни одделенија за надзор.“, изјави на вечерашната прес конференција, министерот за здравство Венко Филипче.

Првиот потврен случај на коронавирус во Македонија е жена на 50 годишна возраст, којашто околу еден месец престојувала во Италија. Болеста и била потврдена, откако се вратила во земјава.

На претходната прес конференција во Владата, епидемиологот Жарко Караџовски информираше дека стручна екипа од Институтот за јавно здравје со полна заштитна опрема направиле епидемиолошка анализа на пациентката, таа е пренесена во Клиниката во изолирано одделение од посебен влез и дека се преземаат сите потребни мерки.

„Ние ја владееме ситуацијата. Постојано сум во контакт со мојот тим, достапен сум на телефон и ова заболено лице не е опасност за останатите граѓани. Работиме по усогласени алгоритми и се подготвуваме веќе подолго време. Со овој случај ништо не е сменето. Ги контролираме граничните премини, даваме упатства и ако некое лице било во контакт со лице кое е можно да било заболено, веднаш ќе го изолираме“, рече Караџовски, кој повтори дека на аеродромот Скопје има медицински екипи, а болниците во Штип, Велес и Гостивар се подготвени.

Надлежните нагласија дека нема место за паника, и ги повикаа граѓаните да се придржуваат на препораките во однос на заштитата од коронавирусот.