Сите патишта водат кон Галичник – 45-то издание на Галичка свадба

Обичаите на традиционалната манифестација „Галичка свадба“, која собира илјадници посетители од земјава и странство, започнуваат вечерва со китење на бајракот и фрлање пушка. Годинава, честа да бидат во фокусот на вниманието на настанот ја добија младите Тања Лепческа, по потекло галичанка и Златко Димовски. Крунисувањето на љубовта на зетот и невестата ќе помине низ  триесетина обичаи коишто се белег на галичкиот крај, негувани и пренесувани низ генерациите, како одење по вода, изведување на ората Невестинско, Тешкото, бричење на зетот и други. Венчавката во црквата св.Петар и Павле ќе се случи утре (недела) во 12.30 часот.

Галичка свадба неодамна доби светско признание како настан, односно беше прогласена за најтрадиционален свадбен фестивал во Европа од страна на „Њујорк тајмс“ и „Национал географик“.

Вчеравечер, со концерт на Влатко Стефановски и Весна Гиновска Илкова кој се одржа на платот пред чешмата Упија во Галичник, беше означен стартот на Галичкото културно лето 2018, чиј главен настан е Галичката свадба.