Сите заболени со коронавирус од гостиварско се на домашно лекување, тестираните медицинари се негативни

Во моментов на инфективното одделение во општата болница во Гостивар нема хоспитализирано ниту еден пациент со Ковид 19. Како што информираше директорот на болницата Јакуп Јакупи, сите осум пациенти позитивни на корона регистрирани на гостиварското подрачје, се наоѓаат на домашно лекување и засега се во добра состојба.

„Моментално немаме хоспитализирани на инфективното одделение и сите потврдени пациенти се третираат во домашни услови.  Не може да кажеме дека сите се без симптоми, но сепак тоа се симптоми во поблага форма и општата состојба им е добра и стабилна. Меѓу заболените, како што веќе информиравме се и тројца вработени во нашата болница. Тестовите на останатите медицински лица од болницата на кои им беа заменеи брисеви се негативни.“, рече Јакупи.

По велигденските празници на потврдените тројца позитивни медицинари, ќе им биде направен контролен тест.

Во статистиката на Министерството за здравство, регионот на Гостивар се води со вкупно 10 случаи на корона. Два од нив се првата и веќе излекувана пациентка од Гостивар, како и еден вработен во Центарот за јавно здравје, кој има два контроли негативни тестови. Останатите се 5 пациенти од Општина Гостивар и 3 од Општина Врапчиште.