Скандалозната група „Јавна соба“ затворена, но има и друга слична група

„Од Секторот за компјутерски криминал и дигитална форензика ме информираа дека групата „Јавна соба“ е затворена. Го поздравувам ваквиот чекор на платформата Телеграм и порачувам дека оние што го прекршиле законот ќе бидат казнети бидејќи ние целосно ги документираме случаите.“, извести вчеравечер преку социјалните мрежи, министерот за внатрешни работи Оливер Спасовеки, кој упати и апел за внимателност додавајќи дека на платформата Телеграм има и друга слична група: „Ние соодветно ќе постапиме и за членовите на оваа група. Сите што го кршат законот соодветно ќе одговараат.“, наведе министерот.

Во текот на вчерашниот ден беа приведени 4 лица, 2 од Битола, 1 од Велес и 1 од Штип, директни учесници во Јавна соба на Телеграм. Полицијата работи на откривање кој ја креирал ваквата група и кои се биле членови.

До моментот на затворање, групата броеше скоро 8.000 членови. Во неа се споделуваа и злоупотребувааа фотографии и видеа од девојки, жени и малолетнички со вулгарни коментари и откривање на телефонски броеви.