Скенирани скоро 20 милиони фискални за поврат на ДДВ

Од почетокот на воведувањето на мерката поврат на 15% ДДВ, заклучно со 19 септември граѓаните скенирале 19.905.878 фискални сметки, остварен е промет од 10.073.372.640 денари, со вкупен ДДВ 1.093.180.972 денари, додека повратот на данокот изнесува 163.977.146 денари или 2.666.000 евра. Овие податоци ги објави директорката на Управата за јавни приходи, Сања Лукаревска, оценувајќи дека  мерката дава резултати, влијае на намалување на сивата економија и враќа пари на граѓаните.

„Само во првите месеци од воведувањето на МојДДВ, јули и август, наплатата на ДДВ е зголемена за 10 % во однос на минатата година. Податоците говорат и дека вкупната наплата на даноци од година во година расте. За илустрација, наплатата на вкупниот даночен приход во 2019 година заклучно со август изнесува 53,4 милијарди денари што е за 9, 2 милијарди денари повеќе , односно за 20.08 отсто  повисока во однос на истиот период во 2015 -та година.“, рече Лукаревска.

Зборувајќи за повратот на ДДВ за фирмите, директорката истакна дека се врши редовно и неселективно кон секој даночен обврзник.

„Во 2019 заклучно со август извршен е поврат за 49.7 отсто повисок во однос на 2016 година. Односно годинава во стопанството се инјектирани 17.042.453.348 денари, додека во 2016 година во истиот период, повратот изнесувал 11 милијарди 906 милиони денари.“, изјави Лукаревска.