Скоро 7.500 невработени во регионот на Гостивар, 800 повеќе од лани истиот период

Вкупната бројка на евидентирани невработени лица во гостиварскиот регион, во кој спаѓаат општините Гостивар, Врапчиште и Маврово Ростуше изнесува 7.449. Податоците ги објави државната Агенција за вработување, а се однесуваат за состојбата со невработеноста до 30 април годинава. Споредено со истиот период минатата година, бројката на невработени е зголемена за околу 800.

Статистиката на Агенцијата за вработување покажува дека најбројни меѓу невработените во гостиварско се лицата со основно или без образование, кои ги има 4.857. Со непотполно средно има 345, со средно образование 1.673, со вишо 36. Како невработени се водат 499 граѓани кои завршиле факултет, како и 39 магистри.

Од вкупниот број на невработени регистрирани во Центарот за вработување Гостивар, 3.539 се од женски пол. Што се однесува до националната припадност, 1.438 се Македонци, 4.145-Албанци, 760-Турци, 664-Роми и други.

Збирните показатели го сместуваат Гостивар, меѓу петте региони со нјамногу невработени во Македонија. Пред Гостивар се: град Скопје (20.916), Прилеп (7.454), Куманово (12.908) и Тетово (13.660).

Вкупната бројка на невработени лица во земјава, заклучно со 30 април изнесува 114.762.