Скоро сите основци со мобилни телефони и интернет – Безбедни ли се децата онлајн?

Речиси секое дете имаат сопствен мобилен телефон, а половина од нив имаат и приклучен интернет на него. На поголемиот дел, компјутерите им се во детските соби и ги користат без надзор од родители. Кога се онлајн децата неретко комуницираат и со лица кои не ги познаваат во вистинскиот живот.

Ова се дел од резултатите од истражување направено на над 500 ученици од повеќе градови во Македонија, меѓу кои и Гостивар. Анкетираните деца биле на возраст од 9 до 14 години.

Анкетирањето за навиките на децата покажало дека: 93% имаат пристап до интернет од дома. На 65% компјутерот на којшто сурфаат им е сместен во детската соба. 91% имаат свој мобилен телефон. 59% од децата не користат аватари и псевдоними кога прават онлајн профили. 53% делумно или целосно се согласуваат дека им е полесно да им кажат на другите што мислат за нив онлајн. Она што загрижува е податокот дека 10% од децата разговараат онлајн со луѓе кои не ги познаваат во вистинскиот живот.

Преку интернет, децата стекнуваат нови вештини, искуства и знаења, но постојат реални потенцијални опасности кои можат да се одразат на нивната приватност и личната безбедност. За безбедност на децата на интернет најважна е едукацијата, за што во најголема мера се задолжени родителите, па потоа училиштата.

На светско ниво се проценува дека скоро 6 милиони деца под 13 години имаат свој профил на фејсбук.