Скринингот за корона на вработените во градинките во Гостивар ќе се спроведе следната недела

Вработените во детските градинки на подрачјето на Гостивар наредната недела ќе бидат тестирани за коронавирус. Активноста е дел од таргетираниот скрининг што го спроведуваат здравствените власти на одредени критични категории.

„Според информациите кои ги имаме од Институтот за јавно здравје, скринингот во јавните институции во Гостивар ќе започне со градинките. Тоа се установи кои треба да започнат да работат, родителите треба да се вратат на работите места, а децата да се згрижени во градинка. Планот е во гостиварските градинки скринингот да се спроведе на 25 и 26 мај. Лично сметам дека скрининг треба да се направи во повеќето институции, кадешто колективно работат повеќе луѓе како болници, општина, јавни претпријатија, училишта и слично“, изјави градоначалникот на Гостивар, Арбен Таравари кој изрази надеж дека на почетокот на јуни градинките ќе почнат потворно да работат.

До сега, скрининг за коронавирус се спроведе на вработени во градинките во Скопје, Велес и Битола. Вкупно се тестирани околу 900 вработени и само еден резултат бил позитивен.