Сметката на Општина Гостивар е одблокирана, но финансиите и натаму се мака

По седум недели блокада поради наплата на долгови од извршители, жиро-сметка на Општина Гостивар е одблокирана. Сепак, финансиската состојба и натаму останува тешка поради актуелната криза и високите суми за електрична енергија, оценува градоначалникот, Арбен Таравари.

„Жиро сметката беше блокирана 7 недели, моментално не е. Но, нема како да се извадиме од оваа криза, ова се проблеми не само на Општина Гостивар, туку и на сите други и на Владата и на државата и на сите институици. Ние последните 6-7 месеци практично плаќаме само струја и плати, со овие сметки што доаѓаат. Никој не предвидуваше дека ќе бидат пет пати поскапи отколку минатата година, па е тешко да се планира и буџетот. И за тие работи што ги извршуваме само се натрупуваат долгови, бидејќи капацитетите за исплата се невоможни.“, рече првиот човек на општината.

Вкупниот догл на општината е околу 7 милиони евра, а Таравари појаснува дека во тоа е пресметан и долгот кон Комуналец, нешто што порано не било пракса.

„За разлика од претходната дминистрација ги презедовме и долговите кои општината ги имаше кон Комуналец, а тоа се околу 2 милиони евра. На пример за време на Бејта тие долгови не беа израчунати, така ако ги тргнеме настрана општинскиот долг е околу 5 милиони евра. Но, ако се има предвид работите што се сработени, влијанието од пандемијата и енергетска криза мислам дека сме не добри, туку многу добри.“, подвлече градоначалникот.

Според неговите информации општината има побарувања од околу 7 милиони евра.