Смртните случаи зголемени за 62%, пораст и на новозаразени – неделен ковид извештај

Во неделниот извешатј на Институтот за јавно здравје регистрирани сe 2.320 нови позитивни случаи на корона од 33 градови во државата со зголемување од 3,9% во однос на минатата недела. Процентот на позитивни од тестирани просечно е 14,7%. Најголем дел од регистрираните случаи се од Скопје (1.007).

Регистрирани се заболени лица во сите возрасни групи. Најзастапена е возрасната група на лица на возраст над 60 (575. Голем број на заболени се регистрира и кај лицата во возрасните групи од 30-39 (445), 40-49  (442), 50-59 (413) и 20-29 (300). Најмал број е регистриран кај децата од 0-9 (38) и 10-19 години (107).

По добиени 2 негативни теста за присуство на SARS-CoV-2 или со употреба на новиот алгоритам, со статус „оздравени“ се стекнале 1.760 лица кои биле хоспитализирани или на домашно лекување, 30,1% помалку во споредба со минатата недела.

ИЈЗ информира дека се пријавени се 70 смртни случаи од 13 градови, со зголемување од 62,8% во однос на минатата недела. Во однос на возраста, 65 лицa биле над 60 години, и 5 лица на возраст од 50-59 години.

Министерот за здравство Венко Филипче, вели дека зголемениот број на заразени лица со КОВИД-19, последниве неколку дена се должи на присуството на „британскиот сој“ на вирусот, за кој е карактеристично тоа што многу брзо се шири. Анализите на МАНУ ќе бидат објавени во наредните денови, а од приватната клиника Жан Митрев посочуваат дека според нивните анализи, кај 70% од пациентите е детектиран „британски сој“. Филипче вели дека во некои градови во државата зголемен е бројот на хоспитализации по болниците, но не до тој степен болничките капацитети да се загрозени.