Смртта на девојчето од Гостивар најверојатно е последица на опасна интернет игра, а не на секта

Трагичната смрт на 13 годишното девојче од Гостивар, најверојатно е последица на наведување преку игра на социјалните мрежи, а не се работи за припадност на некаква секта.

Од наши извори дознаваме дека девојчето учествувало во опасна онлајн видео игра, преку која на децата им се задаваат разни таканаречени „предизвици“ на самоповредување и задачи кои завршуваат со крајно сериозни последици.

Телефонот на младата жртва, којшто е испратен на вештачење треба да ги даде одговорите на прашањата: со кого детето комуницирало, што било барано да прави, и евентуално да се пронајдат непознатите личности со кои комуницирала. Како што претходно соопшти обвинителството, со обдукцијата врз телото било констатирано дека починатата имала и други повреди.

Изминатите години во јавноста често се зборува за две опасни интернет игри Момо и Синиот кит, чија мета се младите, кои се во ранлива возраст и лесно можат да подлегнат на манипулации.

Истрагата за трагичниот случај продолжува.